محمد الدرة ولد محظوظ.. / وليد أيوب

محمد الدرة ولد فلسطيني..

فات ع حلمي،

وحلم كل صاحب ضمير..

من الغرب للصين..

تعمشق ع بيّو وفات بثيابو..

قال الوحش هاجم ومكشّره نيابو..

دخلك يا بيّي فيك تحميني؟

قال له أبوه بالروح أنا بفديك..

وعشان أنا أحميك ترخص لك عيوني..

لو كنت بعرف يا ولد،

إنّو البلد مثل الزبد.. بغلي..

لو قبل ما قلبي غلى..

وعرفت انو قبل ما نقولّك هلا تولّي..

لو قبل ما هبّ الهوا، وقلبي اكتوى بنار النوى..

لو كنت بعرف يا بعد عيني..

إنّو الضبع لسّاتو بعدو ما شبع..

كنت خبّيتك في قلبي.. وضبّيت لثيابي على عبّي..

شواللي جرى.. تالريح في عبّ اللهب بدها حطب،

والحيط ما يحميك.. شو اللي جرى..

يا هل ترى ما عرفت انّو..

ناب الوحش بئذيك؟ شو اللي جرى..

رايح لموتك غندرة.. ورصاص ليل نهار ..

مثل النار مستنّيك؟ شو اللي جرى..

يا مشحّره ي مّو.. ليش خليتيه يطلع لنتساريم ت يسبح بدمّو؟

بكّير كان عليك يا درّه...

بعدو حليب امّك بتمسحو بكمّك..

وبعدو اللؤم والكره ما شمّك..

وبعدا ايدين امّك بتمشّطو شعرك..

وبتفرقو ع جنب.. وتهندزو وتقول

؛ يا تسلم الغرّه..

محتلّ صالي عليك يا درّه بواريدو..

وانت بحضن بيّك.. جناحك ما يعلا لفوق..

وما في حدا لمّك.. والموت ما تريدو..

يمكن كنت محظوظ يا درّه..

ملايين مثلك نيّما لرصاص..

لا شافتن كاميرا ولا ضبّهن حرّاس..

يمكن ولد جنبك وقع،

يمكن صبيّه رايحه ع السوق..

تشكل بكتفا سلّتا..

وبإيدها برقوق.. يمكن بطل ممشوق،

صادتو رصاصة غدر بكتفو وشلّتو..

وما خلّتو يلوّح بايدو هيك للحلوه..

ويودّع المعشوق..

محتلّ صالي عليك يا درّه ويوزّع رصاصو..

ما بين شعر الراس والسرّه..

ريتا ايديه يشلّها ربي..

ريتو نهارو ليل..

ريتا عينيه تعمى..

وما يشوف أبد لشروق