الأحد، 29 يونيو، 2014
امّي بتحبّش تحضر فوتبول. بس دايما وقت المونديال, لسبب بعدني بعرفوش بتشجّع الارجنتين. بيدون ما اعرف ليش امّي بتشجّع الارجنتين(وبتخيل هي بتعرفش كمان), صرت انا, بنت صغيرة, اشجع الارجنتين. بس ابصر كيف دايما نصفّي انا وابوي واختي الي نكون نحضر اللعب, وهي ما تكونش; تكون حايمة حوالي البيت تفتل وتفرن وابصر شو تعمل. بس كانت تطل كل 15 دق تسال عن النتيجة, ويكونوا لعيبة الارجنتين فايتين شي هجمة, وامي تبلش تقول "يلا ولا انت واياه, يلا اوام اسا بدك تجيب جول, يلااا" تصيّحلها هيك شوي وتروح.. وانا وهي تهتف هيك احس انه عنجد اسا راح يجيبو جول, واتطلّع عليها وهي تشجّع وبعدين اتطلع عاللعيبة, واحس انه رح يجيبوا جول وانه امي هي اللي بتيجي بتحرّك اللعبة, رح تعمل سحر وتروح.
اليوم (مش بنت صغيرة), بلعبة المكسيك, بس شافتني اشجّع المكسيك, صارت هي تهتف للمكسيك.. وتشجّع وتصرّخ وتطلّع علي وتشجّع بالاخر... لحد ما هولندا جابت جول.
*من مدوّنة تمارا ناصر http://tamnas.blogspot.co.il
التعليقات